Xildhibaanada dalka Equatorial Guinea ee dhaca bartamaha qaaradda Afrika ayaa laga mamnuucay in ay u baxaan safarro dibadda ah iyaga oon fasax ka heysan madaxweyne ku xigeenka dalkaas Teodorin Nguema oo ah wiilka madaxweynaha dalkaasi.
War ay heshay wakaaladda wararka AFP ayaa sidaan u qornaa” Iyada oo laga duulayo danaha dalka waxaa xildhibaanada dalka la farayaa in ay ka hor inta aysan safrin ay codsi u gudbiyaan guddoomiyaha baarlamaanka iyada oo ay la socoto xukuumadda uu hoggaamiyo madaxweyne kuxigeenka.
Amarkaan oo kale ayaa bishii Juun la dul dhigay shaqaalaha rayidka ah, waxaana ilo xog ogaal ay u sababeeyeen amarkaan afgambigii dhicisoobay ee dhacay bishii Disember sannadkii 2017 oo baaritaankii ka soo baxay ay dawladdu shaacisay bishii Jannaayo ee sannadka 2018ka.
Dawladda Equatorial Guinea ayaa sheegtay in afgambigii dhicisoobay ay ka qayb qaateen koox kala timid dalalka Jaad, Suudaan iyo Jamhuuriyadda Afrikada dhexe, ha se ahaatee ay madax u ahaayeen shaqaale ka tirsan dawladda Equatorial Guinea oo safarro ku tagay qaaradda Yurub.
Safiirkii hore ee dalka Equatorial Guinea u fadhiyay Jaad iyo saraakiil kale ayaa la xiray horraantii sannadkaan, iyaga oo ilaa haddana aan maxkamad la soo taagin.
Madaxweyne ku xigeenka dalka Equatorial Guinea ayay horey maxkamad ku taal dalka Faransa ugu ridday xabsi saddax sanno ah iyo ganaax lacageed oo gaaraya 30 Milyan oo dollar , markii lagu helay in uu sameeyay wax isdaba marin iyo musuqmaasuq.
Madaxweynaha dalka Equatorial Guinea Teodor Obiang Nguema Mbasogo ayaa ka mid ah madaxda ugu xilliga dheer qaaradda Afrika, isaga oo xukunka hayay muddo gaareeysa 38 sanno.
