Agaasimaha Hey’adda Socdaalka iyo Jinsiyadda Soomaaliya G/sare Maxamed Aadan Jimcaale (Koofi) oo war ka soo saaray ajaaniibta Soomaaliya ku sugan

1134

Agaasimaha Hey’adda Socdaalka iyo Jinsiyadda Soomaaliya G/sare Maxamed Aadan Jimcaale (Koofi)  ayaa sheegay in hay’addu ay mustaqbalka dhow ay  doonayso inay xaqiijiso, islamarkaana ay diwaangaliso dhammaan Ajaaniibta dalka joogta ama martida ku ah.

Agaasimaha oo la hadlay Warbaahinta dowladda federaalka ayaa sharraxaad ka bixiyey shaciga socdaalka Soomaaliya oo dhowaan wadatashiyo arrimahaas ku aaddan laga bilaabay Muqdisho, waxa uu sheegay in wadatashiyadaas la gaarsiinayo gobolada dalka.

“Waxaan rabnaa inaan gaarno hey’adda oo xaqiijisay, diiwaangelisay dhammaan ajaanibta dalka joogta ama martida ah, hey’adda oo xogta xuduudaha ku filan, hirgelisayna dhammaan xafiisyada muhiimka u ah, waxaan ku rajo weynnahay inaan galno heshiisyada socdaalka dalalka caalamka oo dhan iyo Soomaaliya oo ka mid noqotay hey’aaha socdaalka caalamka kuwa ugu horreeya ama ugu wanaagsan” ayuu yiri Mr. Koofi

wuxuu tilmaamay in hey’addu ay hirgelisay xafiisyada Jubbooyinka iyo Gedo oo shaqadoodu noqon doonto  ilaalinta dhinac Xuduudaha, iyagoo kaashanaya Hey’adaha amniga dalka.

Dhinaca kale, Agaasimuhu wuxuu   soo  hadal qaadey horumarka Baasaboorka Soomaaliga ah, waxaana uu carrabka ku adkeeyey in caalamka oo dhan uu ka shaqeeyo, hasa ahaatee loo baahan yahay in Soomaaliya ay wadamo adduunka la gasho heshiisyo socdaal, si muwaadiniinta Soomaaliyeed ay ugu fududaato dalka ku galka ama VIISA-ha.

Wuxuu kaloo sheegay in Dowladda Mareykanka ay kala hadleen arrimaha Socdaalka, welina ay wada hadallo u socdaan, xayiraadda Mareykanka toddobada dal uu ku soo rogayna aysan la xiriirin Baasaboorka ee ay tahay arrimaha Socdaalka dedaalkeeduna ay wadaan.

SHARE