Guddoomiyaha Baarlamaanka Puntland oo xilka laga qaaday

61
Guddoomiyaha xilka laga qaaday Cabdixakiin Maxamed Axmed Dhoobo ayaa xilka loo doortay 4 bishii Janaayo 2019-ka.

Xildhibanaada Barlamaanka Puntland ayaa ” xilka ka qaaday” guddoomiyihii Barlamaanka, Cabdixakiin Maxamed Axmed (Dhoobo), waxaana xil ka qaadistiisa u codeesay 49 Xildhibaan, halka 4 xildhibaanna ay ka aamustay.

Gudoomiye ku xigeenka 1aad ee baarlamanka Puntalnd Abuukaate Cabdicasiis ayaa kudhawaaqay in sidaas xilka looga qaaday gudoomiyihii Baarlamanka Puntland, Cabdixakiin Maxamed Axmed (Dhoobo) oo aanan ka soo qeybgalin kulanka barlamaanka.

Waxaa uu sheegay in 44 xildhibaan ay saxiixeen mooshinka ka dhan ka ah Cabdixakiin Maxamed Axmed markii loo soo gudbinayay, kaas oo haatan ay isku raaceen xildhibaano gaaraya 49.

Guddoomiye ku xigeenka 1aad ayaa sheegay in guddoomiyaha lagu soo eedeeyay dhowr qodob, kuna tuntay qoddob ka mid ah dastuurka Puntland, waxaana ay tusaale usoo qaateen hadal la sheegay in uu yiri guddoomiyaha oo ahaa in Puntland ay dhisteen oo ay qabsadeen saddex qabiil, arrintaas oo ay shegeen in ay meel ka dhac ku tahay sharciga Puntland.

Qaar ka mid ah xildhibanaada barlamaanka Puntland ayaa warqad ay ku saxiixan yihiin u gudbiyay guddoomiye ku xigeenka 1aad, waxaana ay guddoomiyaha ku eedeeyeen in xarunta barlamanaka uu soo dhoobay “Maleeshiyaad hubeysan”.

Xarunta Barlamaanka ee Puntalnd ayaa waxaa xalay ka dhacay dagaal u dhaxeeyay ilaalada xarunta iyo ciidamo ka tirsan booliska Puntland, waxaana dagaalkaas ku dhintay saddex qof oo mid kamid ah uu yahay qof rayid halka shan qof oo kalena ay ku dhaawacmeen.

Arintaan ayaa ka dhalatay kadib markii taliyaha ciidanka booliska ee Puntland uu u tegay ciidan ilaalo ka ahaa xarunta baarlamanka, kuwaas oo dhawaan gudoonka baarlamanka uu ku soo xoojiyay ciidammado kale oo aan ahayn kuwii horay u joogay.

Gacan ka hadalka ayaa la sheegay in uu ka dhashay, hadal dhexmaray labada dhinac, waxaana xigtay rasaas ay is-weydaarsadeen labada dhinac.

Xildhibaan Cawil Daad

Taliyaha booliska oo la hadlay warbaahinta gudaha ee Puntland ayaa guddoomiyaha barlamaanka ku eedeeyay in uu keensaday ciidamo maleeshiyaad ah, ayna rasaas ku fureen ciidan boolis ah.

Maamul goboleedka Puntland ayaa waxaa maalmahanba laga hadal hayay mooshin la doonayo in xilka lagga qaado guddoomiyaha baarlamanka.

Guddoomiyihii barlamaanka ee Puntland, Cabdixakiin Maxamed Axmed (Dhoobo) ayaa ilaa iyo hadda aanan ka hadlin xil ka qaadista lagu sameeyay.

Baarlamaanka dowlad goboleedka Puntland ayaa maalmo kahor diiday in xasaanadda laga qaado xildhibaan Cawil Xasan Daad kadib markii uu su’aalo weydiiyay madaxweyne Siciid Cabdullahi Deni, waxaana xildhibnaada ay si aqlabiyad ah ku meelmariyeen in la laalo dacwaddaasi.

Xildhibaan Cawil Xasan Daad oo BBC la hadlay xiligaas ayaa sheegay in haddii kiis loo haysto ay jirto hanaan loo maro, islamarkana ay ahayd in baaritaan la sameeyo.

Xigasho: BBC Somali

SHARE