Erik Prince, madaxii hore ee qandaraaslaha amniga ee Shirkadda Blackwater Worldwide isla markaana si weyn u taageersanaa Madaxweynihii hore Donald J. Trump, ayaa jebiyey cunaqabateyntii hubka ee Qaramada Midoobey ee saarneyd dalka Libya isagoo hub u direy taliye maleeshiyo ah oo isku dayey inuu afgembiyo dowladda uu caalamku taageero, sida ay sheegeen baarayaasha Qaramada Midoobay.
Warbixin qarsoodi ah oo ay heshay jariirada The New York Times isla markaana ay baarayaasha u gudbiyeen golaha amaanka maalintii khamiista ayaa muujineysa sida Mr Prince uu u geeyay ciidamo calooshood u shaqeystayaal ajnabi ah, oo ku hubeysan diyaarado wax weerara, doomaha qoryaha iyo awooda internetka dagaalkii culuslaa ee 2019 Libya ka dhacay.
Qeyb ka mid ah howlgalka, oo ay warbixintu sheegtay in ay ku baxday 80 milyan oo doolar, calooshood u shaqeystayaashu waxay sidoo kale qorsheynayeen in ay sameystaan koox duufaan ah oo dabagal iyo dil ku sameyn kara taliyayaasha Libiya ee la soo xulay.
Mr. Prince, oo ahaa nin horey uga tarsanaan jiray ciidanka qaaska ah ee Navy Seals iyo walaalkii Betsy DeVos, oo ah Xoghayahii waxbarashada Mr. Trump, wuxuu astaan u noqday xad-dhaafka xoogagga millatariga Mareykanka ee gaarka loo leeyahay markii qandaraaslayaashiisii Blackwater ay dileen 17 qof oo rayid Ciraaq ah 2007.
Tobankii sano ee la soo dhaafay wuxuu dib isugu soo noqday sidii fuliyaha heshiisyada – mararka qaarkood macdanta, marar kale oo ku lug leh xoog milateri – dalal dagaal lagu daray laakiin kheyraad hodan ku ah, inta badan Afrika.